ओलीको चिन्तन र कार्यशैली नै समस्याको जड :अध्यक्ष नेपाल

समस्या प्रधानमन्त्रीको चिन्तन र कार्यशैलीमा नै देखिएको होः नेपाल
काठमाडौँ । नेपाल कम्युनिष्ट पार्टी (नेकपा)का अध्यक्ष माधवकुमार नेपालले प्रतिनिधिसभा विघटन गरेर सरकारले संविधानको अक्षर, भावना र मर्मविपरीतको काम गरेको बताएका छन् । प्रतिनिधिसभा विघटन गर्ने प्रधानमन्त्री लेपिओलिको कदमका विरुद्ध नेपाल बुद्धिजीवी सङ्गठनले बिहीबार आयोजना गरेको कार्यक्रममा बोल्दै उनले प्रतिगामी तत्व सडकमा सल्बलाइरहेका बेला सरकारले जनप्रतिनिधिमूलक संस्था विघटन गरेर देशलाई थप सङ्कटमा धकेलेको बताए ।

संविधानमा बहुमतको प्रधानमन्त्रीलाई प्रतिनिधिसभा विघटन गर्ने कुनै अधिकार नरहेको भन्दै उनले प्रतिनिधिसभाले प्रधानमन्त्री चुन्न नसके वा प्रधानमन्त्रीले विश्वासको मत लिन नसकेमा मात्र त्यस्तो व्यक्तिले संसद् विघटन गर्न सक्ने जिकिर गरे ।

संविधानको कुनै धारामा प्रतिनिधिसभा विघटन गर्ने व्यवस्था नभएको र दुई वर्षसम्म अविश्वासको प्रस्ताव ल्याउन नमिल्ने प्रावधान रहेको बताउँदै पूर्वप्रधानमन्त्री नेपालले संविधानमा हुँदै नभएको धारा उल्लेख गरी अन्तरराष्ट्रिय अभ्यासलगायत कुरा राखेर प्रधानमन्त्रीले प्रतिनिधिसभा विघटन गरेको आरोप लगाए ।

प्रधानमन्त्रीले लोकतान्त्रिक परिपाटीलाई नै लत्याएर अघि बढ्न खोजेको आरोप लगाउँदै उनले जथाभावी नियुक्ति गर्नेदेखि गलत काम गर्दै हिँडेको दाबी गरे । “हामीले पार्टीमा विधि, पद्धतिका बारेमा छलफल गरौँ भन्यौँ । नीतिगत राष्ट्रिय सरोकारका विषयमा जनसरोकारका विषयमा छलफल गरौँ, पार्टीभित्र देखिएका आन्तरिक समस्या समाधान गर्न बारम्बार प्रयत्न गर्यौं तर सफल भएनौँ, हामीले उहाँको हरेक कदममा साथ नदिनु नै हाम्रो अपराध हो र ? समस्या उहाँको चिन्तन र कार्यशैलीमा नै देखिएको हो”, उनले भने ।

कार्यक्रममा नेकपाका प्रवक्ता नारायणकाजी श्रेष्ठले प्रतिनिधिसभा विघटन गर्ने सरकारको कदमलाई सर्वोच्च अदालतले खारेज गर्ने र प्रतिनिधिसभा सञ्चालन हुनेमा कुनै द्विविधा नरहेको विश्वास व्यक्त गरे । संविधानको व्याख्या गर्ने अधिकार सर्वोच्च अदालतलाई भए पनि संविधानमा जटिलता देखिए मात्र अदालतले व्याख्या गर्नसक्ने उनले बताए ।

“संविधानमा कुनै जटिलता नभएपछि व्याख्या गर्न जरुरी छैन, धारा ७६ ले स्पष्टसँग भनेको छ, बहुमतको प्रधानमन्त्रीले संसद् विघटन गर्न सक्दैन, यस्तो अवस्थामा सर्वोच्च अदालतले संविधानको व्याख्या गर्नुपर्ने आधार छैन”, पार्टी प्रवक्ता श्रेष्ठले भने ।

Leave a Reply

Your email address will not be published. Required fields are marked *