दलहरुको विवादले जननिर्वाचित संस्थामा असर पर्यो :शर्मा

काठमाडौँ। नेकपाका नेता तथा राष्ट्रियसभा सांसद दीनानाथ शर्माले राजनीतिक दलहरु विभाजन हुँदा लोकतन्त्र कमजोर हुने बताएका छन्। शुक्रबार राष्ट्रियसभा बैठकमा बोल्दै नेता शर्माले दलहरुको आन्तरिक समस्याले जननिर्वाचित संस्थामा असर पर्नु विडम्बना हुने बताए।

राष्ट्रियसभाको सातौँ अधिवेशनका क्रममा मन्तव्य राख्दै उनले आफ्नो पार्टी विभाजनको सङ्घारमा रहेको र प्रतिनिधिसभा विघटन भएको विशिष्ट परिस्थितिमा सभा सञ्चालन भइहेको उल्लेख गरे। “वर्तमान सङ्घीय संसद् गठनपछि आफ्नो राजनीतिक इतिहासमा सबैभन्दा खुशी थिए तर पार्टी फुटपछि आज मुटु चिरिएको अनुभव गरेको छु”, नेता शर्माले भने, “पार्टी विभाजन कुनै सिद्धान्तका आधारमा नभई राजनीतिक कारणले मात्र भइरहेको छ, यो दुःखद हो।”

उनले दलभित्रको अन्तरविरोधका कारण जनप्रतिनिधि मूलक संस्थामा असर पर्नु राम्रो अनुभूति नभएको बताए। प्रतिनिधिसभा नभएको अवस्थामा राष्ट्रियसभाले नीति निर्माण गरेर सरकारलाई सघाउने र खबरदारीको काम गर्ने उनले विश्वास व्यक्त गरे।

नेता शर्माले जनचासोका विषय प्रकट हुने अहिले यो सभा मात्र भएको बताए। उखु किसानको आन्दोलनका क्रममा एक जना किसानको निधन भएको घटनाप्रति दुःख व्यक्त गर्दै उनले मृतकप्रति श्रद्धाञ्जलि अर्पण गरे।

Leave a Reply

Your email address will not be published. Required fields are marked *