प्रधानमन्त्री ओलीले एकलौटी नियुक्तिको तयारी गरेपछि संवैधानिक परिषदको बैठक रोकियो
सभामुख सापकोटा बैठकमा गएनन्

काठमाडौँ। संवैधानिक परिषद्का अध्यक्षसमेत रहेका प्रधानमन्त्री ओलीले मंगलबार बोलाएको संवैधानिक परिषदको बैठक सभामुख अग्नि सापकोटा नगएपछि रोकिएको छ ।

प्रधानमन्त्री ओलीले एकलौटी रुपमा आफूनिकट व्यक्तिहरुलाई नियुक्त गर्ने तयारी गरेपछि असन्तुष्ट रहेका सभामुख सापकोटा परिषदको बैठकमा नगएका हुन् ।

सभामुखको सचिवालय स्रोतका अनुसार संवैधानिक परिषद्का अध्यक्षसमेत रहेका प्रधानमन्त्री ओलीले बैठकका लागि आवश्यक गृहकार्य,समन्वय र सल्लाह नगरेकाले सभामुख सापकोटा बैठकमा नगएका हुन् ।

‘प्रधानमन्त्री ओलीले एकलौटी रूपमा आफूनिकटका व्यक्तिहरूलाई नियुक्तिका लागि सिफारिसको तयारी गरेपछि साक्षी बस्नैका लागि उहाँ नजानुभएको हो’, उक्त स्रोतले भन्यो ।

परिषदको बैठकका एजेण्डाहरु ४८ घण्टाअघि नै सदस्यहरुलाई उपलब्ध गराइनुपर्ने व्यवस्था भए पनि प्रधानमन्त्रीले  त्यसो नगरी बैठक बोलाएको बताइएको छ ।

विभिन्न संवैधानिक आयोगहरुमा रिक्त रहेका ४५ पदाधिकारीको नियक्तिका लागि प्रधानमन्त्री ओलीले परिषदको बैठक बोलाउँदै आए पनि  बस्न सकेको छैन ।

यसअघि आइतबार पनि सभामुख सापकोटा र प्रमुख प्रतिपक्षी दल कांग्रेस सभापति शेरबहादुर देउवा नजाँदा कोरम नपुगेर बैठक बस्‍न सकेको थिएन। परिषदको बैठकमा कोरम पुग्नका लागि प्रधानमन्त्रीबाहेक ४ जना सदस्यको उपस्थिति अनिवार्य हुनुपर्ने संवैधानिक व्यवस्था छ। अहिले ४ जना सदस्यमात्र रहेकाले कोही एकजना उपस्थित नहुँदा पनि बैठक बस्न सक्दैन ।

प्रधानन्यायाधीश र संवैधानिक निकायका प्रमुख र पदाधिकारीहरूको नियुक्तिको सिफारिस गर्न प्रधानमन्त्री, प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष, प्रतिनिधिसभाका विपक्षी दलका नेता र प्रतिनिधिसभाको उपसभामुख सदस्य रहेको संवैधानिक परिषद् रहने संवैधानिक व्यवस्था छ।

Leave a Reply

Your email address will not be published. Required fields are marked *