भेनेजुएलामा रुसी सेना ल्यान्ड भयो

शुक्रबार दिउँसो रसियन सैनिक हवाई अड्डाबाट दुईवटा हवाई जहाज भेनेजुएलाको राजधानी काराकसको लागि उडेको फ्लाइट ट्र्याकिङ्ग वेबसाइटले देखाएको थियो भनि एक रुसी समाचार प्रधान वेबसाइट फोर्ट रस न्युज ( एफआरएन )ले जनाएको छ । समाचार अनुसार २२ मार्च, त्यसैगरी २४ मार्चमा पनि अर्को एउटा हवाई जहाज काराकसकै लागि उडेको सोहि वेबसाइटमा देखाइएको एफआरएन (फोर्ट रस न्युज )ले उल्लेख गरेको छ । यो समाचारलाई टर्किको अंग्रेजी भाषाको टेलिभिजन च्यानल टीआरटिले समेत २५ मार्च सोमबारका दिन दृश्य सहित देखाएको थियो ।

एफआरएनको समाचारमा काराकसका स्थानीय पत्रकारलाई उधृत गर्दै शनिबारका दिन भेनेजुएलाको प्रमुख हवाईअड्डामा रसियन एयरफोर्सका दुई वटा हवाई जहाजहरु उत्रेका जनाइएको छ । उक्त हवाईजहाज हरुले रक्षा मामिला संग सम्बन्धित अधिकारिहरु र एकसय सैनिकहरु ल्याएको समाचारमा उल्लेख छ । मस्कोले सिरियामा जस्तै भेनेजुएलामा ‘रेड लाईन’को नीति अन्तर्राष्ट्रिय समुदाय सामु प्रदर्शन गरेको समाचारमा बताइएको छ ।

३ महिना अघि दुई देश बीच भेनेजुएला मै संयुक्त सैनिक अभ्यास भएपछिको यो अर्को कदम हो । संयुक्त सैनिक अभ्यासलाई भेनेजुएलाका राष्ट्रपति निकोलस मडुरोले दुई देश बीचको सम्बन्ध घनिष्ट भएको संकेतको रुपमा लिएका थिए । तर सोहि अभ्यासलाई अमेरिकाले “सो क्षेत्रमा रुसी घुसपैठ”को संज्ञा दिएको थियो । तर भेनेजुएला एक स्वतन्त्र र सार्वभौम देश हो भन्दै भेनेजुएलाको सरकारको बारेमा समाचारमा भनिएको छ “यो साम्राज्यबादको हस्तक्षेपलाई रोक्न बनेको एक मौलिक प्रयास हो ।” भेनेजुएलाको बैधानिक सरकारको अनुरोधमा रसियन सैनिक सल्लाहकारहरु र अन्य सैनिकहरु आएको समेत समाचारमा उल्लेख छ ।

एकजना समाचारदाता ह्याभियर मायोर्काले शनिबार ट्विटर मार्फत एउटा प्लेनले स्थल सेनाका प्रमुख भ्यासिली तोंकोश्कुरोभलाई र अर्कोले ३५ टन सामान लिएर आएको सुचना दिएका थिए ।

इल्युसिन आइएल – ६२ यात्रुबाहक जहाज र एण्टोनोभ एएन – १२४ सैनिक मालबाहक जहाज शुक्रबारका दिन च्क्लोब्स्कि रसियन सैनिक एयरपोर्ट बाट उडेको तथ्य फ्लाइट ट्र्याकिङ्ग वेबसाइट फ्लाइट राडार २४ ले बाहिर ल्याएको थियो । ति हवाई जहाजहरु सिरियामा केहीबेर रोकिएको समेत समाचारमा लेखिएको छ ।

अर्को फ्लाइट ट्र्याकिङ्ग साइट अड्स्बेएक्सचेन्जले जनाए अनुसार आइतबार मध्यान्ह पछि काराकसको लागि अर्को मालबाहक हवाइजहाज उडेको थियो ।

यस सम्बन्धमा रुसको विदेश मन्त्रालय, रक्षा मन्त्रालय र क्रेमलिनका प्रवक्ता मौन छन् ।

ट्रंप प्रशासनले भेनेजुएला माथि कडा नाकाबन्दी लगाउनुका साथै त्यहाँको सेनालाई राष्ट्रपति मडुरो बिरुद्ध उत्रन खुल्लेआम आह्वान गरेको छ । मडुरोले नाकाबन्दीलाई साम्राज्यबादी हस्तक्षेप बताउँदै आएका छन् ।

राष्ट्रपति मडुरोलाई रुस र चीनको बलियो समर्थन प्राप्त छ । आजका दिन सम्म अमेरिकाका कठपुतली गुऐडो र अमेरिकी प्रयास भयङ्कर अप्ठ्याराहरु झेल्दै असफलताको दिशा तर्फ उन्मुख छ । कठपुतली गुऐडोले अमेरिकी घोषणा बाहेक अन्य कुनै शासकीय शक्तिको अभ्यास गर्न सकेको देखिदैन ।

अमेरिका आफ्नै ‘ करेसाबारी ‘मा आफ्नो प्रभाब गुमाउदै गैरहेको देखिदैछ । अमेरिका आधिकारिक रुपमै संयुक्त राष्ट्र संघको घोषित सिद्धान्तलाई तोड्दैछ र प्रत्येक सार्बभौम देश हरुको आत्मनिर्णयको अधिकारलाई कुल्चदै ‘मुनरो डक्ट्रिन’लाई पुनर्जीवित गर्दैछ ।

गत डिसेम्बरमा पनि रुसले आणविक हतियार बोकेर उड्न सक्षम दुईवटा बमबर्षक लडाकु बिमानहरु पठाएर मडुरोको सरकारलाई बलियो समर्थन रहेको स्पष्ट पारेको थियो । तर अमेरिका रुसको यस कदम बाट क्रुद्ध हुनु सिबाय अन्य प्रतिरोधात्मक कारबाही गर्न सकेन ।

राष्ट्रपति मडुरोले अर्को हप्ता रुसले पठाएको औषधिहरु भेनेजुएला आइपुग्ने कुरा गत बुधबार बताएका थिए । गत फेब्रुअरीमा रुसले ३०० टन मानवीय सहायताको प्याकेज पठाएको थियो । आगामी दिनमा समेत रुसबाट यस्तै सहयोगको अपेक्षा भेनेजुएलाले राखेको देखिन्छ ।

भेनेजुएलामा फेब्रुअरी महिना मै अमेरिका बाट बिपक्षी नेताको आह्वानमा आएको कथित ह्युमनिटेरियन एडको काफिलालाई सिमाना मै रोकिएको थियो । पछि बिपक्षी नेता गुऐडोका कार्यकर्ताहरुले नै त्यो कथित सहायता बोकेर आउने लरीहरुलाई आगो लगाएर नष्ट गर्दै ति लरी भित्र भएका सामानको रहस्यलाई दबाएका थिए । भेनेजुएला सरकारको ति लरीहरुले हात हतियार र सैनिक सामान ल्याएको आशंका गरेर तिनी हरुलाई कोलम्बियाको सिमानामा रहेको कुकुता शहर मै रोकेर भेनेजुएला प्रवेश गर्न दिएको थिएन ।

Leave a Reply

Your email address will not be published. Required fields are marked *