हिउँले जनजीवन कष्ट, भेडाबाख्रा मर्दै

मार्तडी । बुधबारदेखि आएको लगातारको वर्षा र हिमपातका कारण जिल्लाको हिमाली गाउँपालिका– १, २ र ३ वडा विच्छ्याका स्थानीयवासीले निकै सास्ती भोग्न थालेका छन् ।
उक्त क्षेत्रमा रहेको गुम्बामा तीन देखि पाँच फिट हिउँ परेर जमेका कारण स्थानीयवासी घरबाहिर निस्कन नपाएर जनजीवन कष्टकर बनेको छ ।

सो गाउँपालिकाका उच्च भेगमा पर्ने युना, गुम्बा लगायतका दर्जनौ बढी स्थानमा भएको बाक्लो हिमपातका कारण एक दर्जन बढी पशु चौपाया मरेका छन् ।

हुम्ला सिमिकोट गाउँपालिका डाडाँफयाका कपिल सुनारका चरीचरनका लागि गुम्बा ल्याएका ४५ वटा भेडाबाख्राहरु पालमाथिको हिउँले च्यापिएर मरेका छन् ।

सो क्षेत्रमा लगातारको बर्षाले स्थानीयलाई घरबाट बाहिर निस्किन र पशुचौपायालाई चरीचरन र घाँसपानी गर्न समेत निकै कठिन भएको हिमाली गाउँपालिकाका अध्यक्ष गोविन्द्र बहादुर मल्ल्ले बताए ।

यो क्षेत्र जिल्लाको विकट गाउँपालिका हो । त्यो क्षेत्रमा लगातार बर्षासँगै हिउँ पनि परिरहेको स्थानीयबासीको भनाइ छ ।
लगातारको बर्षाले बाटो भत्किंदा गुम्बा र युनाका स्थानीयलाई आवतजावत गर्न पनि निकै समस्या भएको छ ।

गाउँपालिकाको तीन वटै वडामा हिमपात बाक्लो भएकाले विद्यालय पुर्ण रुपमा बन्द भएका छन् । सो क्षेत्र सदरमुकाम मार्तडीबाट चार दिनको पैदल यात्रामा रहेको छ ।

लगातारको वर्षा र हिमपातले गर्दा ग्रामिण क्षेत्रका स्थानीयहरुले निकै सास्ती भोग्नु परेको छ । माघ पहिलो साताबाट सुरु भएको जिल्लामा हिमपातले ग्रामीण सडकसमेत अवरुद्ध बन्दै गएका छन् ।

मार्तडी–कोल्टी सडक खण्डको पोरखे लेकमा बाक्लो हिउँ जमेका कारण उक्त क्षेत्रमा सवारी साधन चल्न सकेका छैनन् ।
मार्तडीबाट कोल्टीमा संचालन हुदै आएका जीप र माल बाहक ट्याक्टर समेत सदरमुकाममा थन्किएका छन् ।

पोरखे लेकमा पाँच फिट बढी हिउँ जमेका कारण अझै हिउ पग्लन समय लाग्ने भएकाले मार्तडी आउने र कोल्टी जाने यात्रुसमेत हिडेर यात्रा गर्नुपर्ने बाध्यता रहेको छ ।

हिउँ बढी भएका कारण आवतजावत गर्न निकै समस्या भएको स्वामीकार्तिक खापर गाउँपालिका–३ जुकोटका स्थानीय जीत बहादुर शाहीले बताएका छन् ।

यहाँ वर्षा नरोकिएका कारण अत्याधिक रुपमा चिसो बढेको छ । चिसोका कारण जिल्ला अस्पताल बाजुृरामा विरामीहरुको घुईचो लाग्ने गरेको जिल्ला स्वास्थ्य कार्यालय बाजुराले जनाएको छ ।

चिसोबाट वृद्धवृद्धा,बालबालिका र दीर्घरोगी बढी प्रभावित भएको जिल्ला स्वाथ्य कार्यालय बाजुराका प्रमुख डाक्टर रुपचन्द्र विश्वकर्माले बताए ।

Leave a Reply

Your email address will not be published. Required fields are marked *