अटोरिक्साले ट्राफिक जाम

बाँके । नेपालगञ्ज–कोहलपुर फोरलेन सडकबाहेक भित्री सडक अत्यन्तै साँघुरा र जीर्ण छन् । कतै मर्मतसँगै फराकिला बनाइँदैछन् भने कतै जीर्ण अवस्थामै छन् । २० वर्षअघि बनेका सडक अहिले साँघुरा गल्लीजस्तै लाग्छन् ।
जनसङ्ख्याको वृद्धिदरसँगै सवारी साधनको चाप पनि सोही अनुपातमा बढिरहेको छ । ठूला भवनसँगै भौतिक पूर्वाधारका अन्य संरचना एकपछि अर्को गर्दै बनिरहेका छन् । त्यसमाथि सवारी साधनको सङ्ख्यामा उस्तै वृद्धि भइरहेको छ ।

नेपालगञ्जमा अन्य सवारीको सङ्ख्याभन्दा ब्याट्रीबाट चल्ने अटोरिक्साको सङ्ख्या ह्वात्तै बढेको छ । साँघुरा सडककै कारण नेपालगञ्जले बेलाबेलामा अन्य शहरको जस्तै ट्राफिक जाम भोग्न थालेको छ । अटोरिक्साको सङ्ख्या बढेसँगै नेपालगञ्जमा ट्राफिक जामको समस्या शुरु भएको नेपालगञ्ज–२, घरबारी टोलका व्यवसायी मनोज बन्जारा बताएद ।

साधारण रिक्सा विस्थापित गर्दै ब्याट्री तथा पेट्रोलबाट चल्ने अटोरिक्सा सञ्चालनमा आएपछि भित्री सडकमा बेलाबेलामा ट्राफिक जाम हुने गरेको नगरवासीको भनाइ छ ।

नेपालगञ्जका निकै व्यस्त रहने घरबारी टोल, सदरलाइन, त्रिवेणी मोड, एकलैनीलगायतका क्षेत्रमा ट्राफिक जामको समस्या देखिइरहेको छ । “दैनिक एकपटक जाम हुन्छ”, सदरलाइनका स्थानीयवासी जमिल शेख भन्छन्, “पहिले कमै सवारी चल्थे, भीडभाड हुँदैनथ्यो । अहिले भने सवारीको भीड र होहल्लाले हैरान बनाउँछ ।”

साधारण रिक्साभन्दा छिटो गन्तव्यमा पुगिने भएकाले यात्रुहरू अटोरिक्सामै चढ्छन् । यात्रुको रोजाइमा अटोरिक्सा नै परेपछि नेपालगञ्जमा अटोरिक्साको सङ्ख्या एक्कासी बढेसँगै ट्राफिक व्यवस्थापनमा समेत समस्या भइरहेको जिल्ला ट्राफिक प्रहरी कार्यालय बाँकेका प्रहरी निरीक्षक हिरेन्द्र रोकायले बताए ।

यसअघि अटोरिक्सालाई फोरलेन सडकमा चलाउन प्रतिबन्धसमेत गरिएको थियो । तर उक्त निर्णय कार्यान्वयनमा भने आउन सकेन । अटोरिक्साले लेन अनुशासन पालन नगर्दा ट्राफिक प्रहरीको टाउको दुःखाइको विषय बनेको छ ।

सडकमा जथाभावी पार्किङ गरिदिँदा ट्राफिक व्यवस्थापनका लागि चोकमा खटिएका दुई÷तीन जना ट्राफिक प्रहरीको काम उनीहरूलाई व्यवस्थित गर्नमै बित्ने गरेको छ, नेपालगञ्जको धम्बोझी चोकमा ड्युटीमा खटिएका प्रहरी हवल्दार कुलबहादुर वलीको भनाइ छ ।

अटोरिक्साको जथाभावी पार्किङ्कै कारण नेपालगञ्ज–कोहलपुर खडकखण्डको राँझा चोक र गनापुर चोकमा पटक–पटक सवारी दुर्घटनासमेत भएको ट्राफिक प्रहरी पोष्ट गनापुरका इन्चार्ज दिनेशकुमार पण्डितको भनाइ छ । यातायात व्यवस्था कार्यालय भेरी नेपालगञ्जले रुट परमिट जारी गरेको भए पनि अटोरिक्सा भने आफूखुशी चल्दै आएका छन् । रासस

Leave a Reply

Your email address will not be published. Required fields are marked *